«Самукъане суьйре»

          Б1аьсте! Ма хаза йог1у-кх хьо б1аьсте!

Хьан дитташа  тосучу зазано,  хьалкъедачу эсалчу зезагаша, ломара сихделла, вовшашка шабарш деш, охьахьаьвддачу татолаша, шайн  наной вайна цабевзачу маттахь т1ебоьхучу дийнатийн к1орнеша,  шаьш схьакхаьччий хаийта г1ерташ,  ч1ир-ч1ир дечу хьозарчаша, сихъелла кхаш т1е оьхучу белхан машенаша,  ахархоша кечдечу  латтанаша  цхьа тамашина дог-ойла т1ома йоккхий, дагна аьхна йовхо ло, цуьнан чаккхе  токхе хирг хилар хоуьйтуш санна.

Иштта самукъане б1аьста дог1учу  х1окху хазчу дийнахь д1ахьо Шелковски к1оштан Дубовскера юккъерчу школехь «Нохчийн меттан Де» даздарна лерина  йолу  «Самукъане суьйре».

        25 апрель - Нохчийн меттан Де  даздар ламаст хилла д1ах1оьттина  тхан школехь. Къаьсттина ладам болуш кечам бо кху денна массо школан белхалоша, дешархоша.

         Х1ора нохчийн мотт хьоьхуш волчу хьехархочо забаре сценкаш кечъярца,оцу сценкашна забаре афишаш кечйира.Оцу афишаша схьагулбира маттаца гергарло лело лууш мел верг: дешархой, хьехархой, берийн дай, наной.

   Дукхахболчу дешархойн таро хилира шайн маттах лаьцна болу хаамаш гайтина ца 1аш, артийстийн говзаллехь шайн корматалла зен. Юьхьанцарчу классашкара дуьйна д1а цхьайтталг1ачу классе кхаччалц болчу дешархоша самукъадолуш дакъалецира оцу цхьаьнакхетарехь.

            Директора, Испайханова Элина Абдулкадыровнас, тидамза ца дитира нохчийн меттан хьехархоша хьегна къа. Цо баркаллица грамоташ луш, совг1ат дира х1ора тоба кечйинчу хьехархочунна.

             Иштта б1аьстенан  боларх йоьзна токхе гуьйре санна, вайн меттан сий лакхадоккхуш, цунна лерина кечъечу мероприятеша къуона т1аьхье кхиийтарна цхьа к1еззиг бина т1е1аткъам бинехь, маттаца долу гергарло токхе хиларе сатесна ду тхо.

                Муьлххачу а нохчочо вайн мотт кхиор, 1амор, безар,1алашбар, ларар д1ахьуриг хиларх тешна ду тхо.

Шелковски к1оштан Дубовскера юккъерачу школан нохчийн меттан хьехархо Алсултанова Таус Магамедовна.